Op Oedingsch Enne Pull Kaffee
Krefeld · Dä Wäcker örjelde öm säes Uhr. Noch eemol römdrehe. No fönf Minüdde örjelde dä all wier. Mer krieje de Ooge net op. Noch twee Minüdde. Dann werde mer öm sibbe Uhr wakrich. Dä Jet deng öm tehn Uhr starte. Enschecke möss öm halver nüng sien. Et Taxi wor bestellt för aach Uhr .
Nau sollde een Stond wall jenoch sin för sech parat te maake. En de Rejel stemmt dat och. Mar enne Rentner hätt sech met de Tied an twee Stond jewennd. Die brug dä för tu wäsche, kämme, aantrecke, Kaffedösch decke, Kaffe opschödde, Botterramme schmeere, Kaffe enschödde, et Blättsche stodiere, Kaffedösch avrüeme, et schmäerije Jescherr en de Spöelmaschien . . ..
Nau moss alles en een Stond jeloope sin. On et leep wie jeschmiert. Bes ech de Kaffe enschödde deng. Die Tass wor all fass voll, wenn et passierde. Ech weet bis vandag noch net woröm die Tass kippde. Jroote Rettungsaktion met de freie Hankg. En halve Tass Kaffe wor jebleewe. Die angere Hälf verdellde sech en de Ongertass, öwer et Brettsche, öwer de Döschdeck, dröbbelde op de Stohl on op dä Boom. Dat wor öm halver aach. Dä Schöddelplack on die Roll met Wischweg wore en de Köek. Dä Kaffe dröbbelde. Wat en halwe Tass doch för ne fiese Pull jöwt. Mama kömmerde sech öm de Ongertass, et Brettsche on de Döschdeck. Ech kroop om Boom erröm. Dat Wischweg packde den Pull net. Nau kroop Mamma mem Schöddelplack henger mech her. Dä letzde Drop wor weg, do klingelde dat Taxi.
Met ohne wat em Maag jöckde mer no Lohhause. Mer jenge dann richtich en de Loff, ech noch met Kaffeflecke en de Box. Dann schödde ie Stuadess Kaffe en. So wie dat sin moss! KÖEB UUT OEDING
