Op Oedingsch Dä posteliene Teller
Krefeld · Drickes on Jritt hant ehr Jlaaserkäes all voll met Postelien. Net met effe Köpkes, Kanne,Tellere, Kömpkes, Pöttsches, Fijürkes, näe, denne ehre janze Postelien stammt uut Meißen, wat in de Nöh van Dresden es.
Drickes hadde all emmer Spaß an et alde on och neuere Postelien uut Meißen. Hä koppde dovan, sovöll hä krieje on betahle koss. Op de Köer wor Drickes all en sin Lälbecks Johre jekomme. On dat wor so: Fiene, wat sin Ärwtant wor, deng bee jedde Jelejeheet met twee janz alde Teller uut Meissener Postelien stronze. Die hatt se van ehr Jroos jeärwd. Die Teller wore jood 200 Johr ald on henge en de Deel van Fienchens Huus. "Tante Fienchen, kannste mich die Teller net hütt all verärwe? Wat wellste met dä alde Krooem?" "Nix", sait Tant Fienchen, "die Teller bliewe do hange!" Kinn noch son Beiere deng baate.
Mar Drickes leet de posteliene Teller van Tant Fien nie uut de Ooge. On dann passeerde et: Eene van die beds Teller wor jefalle on loog en honged Schärwe op de Booem. "Nau hann ech kinne Spaß mehr draan," sait Fiene för Drickes, "nähm se met". Flöcks nohm Drickes dä janze Teller van de Wangk on rappde höeschkes vam Booem en Schärw noe de angere op. Wäejes dat hä enne Fummeleures wor, deng hä en halw Johr nix angersch, als wie de Schärwe tesaametesette on te lieme. Dä janze on dä jefleckde Teller uut Meißen honge nau stiefstaats bee Drickes en de joode Stoow.
On dann jooew et en een Nait enne förchterliche Krach. "Wat enne Knöes!" reep Drickes. "janz seeker is dä jefleckde Teller rongerjekomme. Nau wor die janze Prasselee ömsöns." Mar nix. Et wor net dä jefleckde Teller, et wor dä janze, dä nau op de Booem römfloog! En dusend Schärwe so jood wie een!
KOEB UUT OEDING
