Heukeshowwer Platt Wie janz Heukeshowwen enn blo'em Damp oppjejangen wohr
Hückeswagen · Heukeshowwen Vörr sewwenzech Johren wohr förr Heukeshowwen dä Kreich am Äng. De Ammis hadden hie datt Rejjimänt. Ehn Dach, bevörr se hie enntrocken, wu'eten enn de Pauloskerke unn de ATV-Hall de Dühren oppenjematt. Do wooren höpewies Klamotten, Tebak, Schnäpse unn wecker weet, watt sönns all, vann dä Wehrmacht jelarert wuuhren. Nu kunnten de Heukeshowwer dröwwer herfallen, unn dä'en datt ock. Wecker äwen jodd opp dänn Beenen woor, dä schleppde so völl hä oder ätt drärren kunnte, opp heem ahn.
Heukeshowwen Vörr sewwenzech Johren wohr förr Heukeshowwen dä Kreich am Äng. De Ammis hadden hie datt Rejjimänt. Ehn Dach, bevörr se hie enntrocken, wu'eten enn de Pauloskerke unn de ATV-Hall de Dühren oppenjematt. Do wooren höpewies Klamotten, Tebak, Schnäpse unn wecker weet, watt sönns all, vann dä Wehrmacht jelarert wuuhren. Nu kunnten de Heukeshowwer dröwwer herfallen, unn dä'en datt ock. Wecker äwen jodd opp dänn Beenen woor, dä schleppde so völl hä oder ätt drärren kunnte, opp heem ahn.
Nu kom ehner enn paa Daach dropp memm Rad vann Ro'er no Heukeshowwen. Hä moche seck zauen, domett hä am Äng vann dä "Sperrzeit" vann sewwen Stonden wi'er enn Ro'er woor. Te'iersch wullte hä enns kicken, wie ett dämm Passtuur Rottlaender jeng. Dä meinde: "Hörr enns. Häwwent enn Ro'er ock watt te Rooken?" "Kinnen Krümmel!" "Enn Heukeshowwen hävve äwwer tebaschen. Wa, eck holl Di enn Hankvoll Zigarren. Die send utt dämm Wehrmachtsdepot utt dä ATV-Hall vamm Fürstenbärch." "Ja sowatt. Dann särr eck ock Dank."
Nu kom hä nomm Walter Rämmy. Ett jeng ömm Mossek. "Te'iersch mott eck Di vertällen, datt mi dä Passtuur Rottlaender jraad enn Hankvoll Zijarren jedohen hätt. Datt ess jo dä reine Wahnsenn." "Watt dann? Enn Hankvoll? Dä ahl Jizzkraren! Wa, eck dau Di enn janze Blos voll unn enn paa Päckelcher Türkenkost-Tebak."
Dä Röttsche moch ock noch äwen sinnem Schworer Wellem Dach särren. Dä madde ämm enn janzen Bühl mett Zarätten, Zijarren unn Pippentebak terächt. Voll jepackt unn so jlöcklech wie lang nech mä, kom hä jraad noch terächt enn Ro'er ahn, bevörr de Spärrstond am Äng wohr.
Emm Trappenhus trop hä sinnen Nober Erich. "Erich, hässe nex te Rooken förr meck?" "Wo sall eck datt dann dänn kriejen?" "Oorenbleck!" Dann schudde hä dänn Bühl mett dä janzen Härrlechkeit utt. Dä Erich schlauch de Häng öwwerm Kopp tesaamen. "Eck hävv noch vann vörr dämm Kreich twee Fläschen Mosel-Wien emm Käller. Die holl eck ropp, unn dann stäckve ons enn decke Zigarr ahn. Watt meinße?"
Bi dä ehnen Zigarr esset nech jeblewwen. Die Twee hadden alles ömm seck römm verjätten: Dänn Kreich, die schräcklejen lätzden Daach mett dänn Jabos, dänn ennjeschlarenen Jranaten. Se leiten de janze Wält ömm seck römm enn blo'en Damp oppjohen. So hadden de Heukeshowwer mettjeholpen, daddet dänn Röttschen förr enn kotte Tittlang jodd jejangen woor.
