Heukeshowwer Platt Datt kunnte me enn Älberfäld nech koopen

Hückeswagen · heukeshowwen Ömm bi dänn "Flienejen Fazzüünern", di ett fuustdeck henger dänn Ohren setten hadden, te bliewen, fällt mi dä ahl Freihoff utt dä Lüttjenau enn. Hä wullte pattuu ock enns mett dä Iesenbahn no Älberfäld. Me hadde enn Heukeshowwen vertaalt, enn Älberfäld künnte me all datt kriejen, wattme enn Heukeshowwen nech krärrche.

heukeshowwen Ömm bi dänn "Flienejen Fazzüünern", di ett fuustdeck henger dänn Ohren setten hadden, te bliewen, fällt mi dä ahl Freihoff utt dä Lüttjenau enn. Hä wullte pattuu ock enns mett dä Iesenbahn no Älberfäld. Me hadde enn Heukeshowwen vertaalt, enn Älberfäld künnte me all datt kriejen, wattme enn Heukeshowwen nech krärrche.

Wie hä mett dämm Billjett dridder Klasse nu do ahnkom, jeng hä schnurstracks nomm Koophus "Tietz". Dä Verkööper frochde änn, watt hä häwwen wöllte. "Watt eck häwwen well, datt häwwen Ätt soweso nech!" Dä Verkööper schmedde seck enn de Boscht unn meinde, se hödden alles. Do sache dä Freihoff: "Sövve ömm ti'en Maak wätten, datt Ätt datt, watt eck bruck nech hävvt." "Die Wette gilt." "Dann dauen Se mi enn Brell vörr onsen Ossen!" Dä Verkööper kecke dösech utt dä Wäsche. Sowatt hadden se nu tazächlech nech.

Hä moch dämm Freihoff die ti'en Maak dauen un sache, hä söllte nomm "Klischan" näwwenahn johen, dä hödde äwwer alles. "Mi sallet woll ejaal si'en", sache dä ahl Freihoff. Dä "Tietz"-Verkööper reip dann flott sinnen Kumpel bimm "Klischan" ahn: "Du, do kömmt jlick sonnen oberschlauen Bu'er utt dä Heukeshowwer Kante unn well enn Brell förr sinnen Ossen häwwen. Sonnen Quatsch hävv vie jo nech. Nu hävv eck mett ämm ömm ti'en Maak jewättet, datt vie datt doch hödden. Die hävv eck nu verloren. Eck hävv jesacht, Ätt hödden alles. Maak schi'er sonn Dengen utt Droht unn wätt mett ämm ömm twöntech Maak. Dann deeße mie die ti'en Maak wi'er retuur unn Du sälws häss ock ti'en."

Nu kom datt Heukeshowwer Fazzuun nomm "Klischan". Dä Verkööper soch änn alt rennkummen unn hadde alt sonn Droht-Jeställ wie enn Ossen-Brell hengerm Rüjjen. "Was kann ich für Sie tun?", meinde hä. Do sache dä Freihoff: "Watt Sie dauen künnen, datt wett eck nech. Eck bruck watt, watt Ätt secher onn wahrhaftech nech häwwen." "Oh doch, sövve ömm twöntech Maak wätten, datt vie datt bestemmt häwwen, watt Sie koopen wöllen." Dä ahl Freihoff kecke unger sinner Brell dänn unn beschedde:"Die Wätte jillt."

Dä Verkööper krosde alt datt Droht-Jeställ henger sinnem Rüjjen dänn. Do meinde dä Freihoff: "Dann dauen Se mi enn paa Weckeljamaschen förr onsen Kanari'en-Vorrel." Dä Verkööper hadde dösech utt de Wäsche jekecken. Dä Freihoff nech. Hä hadde die twöntech Maak ennjestrecken unn wohr mett dämm "Waldbröhler" emm twöntech opp Säss wi'er opp Heem ahn jefahren. Enn Heukeshowwen hadde hä vertaahlt: "Schwiejent mi doch stell vann Älberfeld. Do kamme noch lang nech alles kriejen. Eck well enns bimm Johann Wellem Luhn kicken, off dä enn Drillbohrer förr Käs-Löcker hätt."

(RP)
Meistgelesen
Neueste Artikel
Zum Thema
Aus dem Ressort